» Über uns

» FAQs

» Linggs

» Intärn

DOT's Wednesday @ Herbschtmäss (02.11.2006, 08:32)

S'isch Novämber, s'isch Mittwuch und es isch sogar einigermasse kalt. Das ka numme eins bedytte: d'Deppe gehn an fascht scho traditionelle Herbschtmässbummel. Vollbestand isch no nie erreicht worde, in däm Joor händ dr Diibidääbi und dr Quinto gfählt. Trotzdäm sind dr Joël, dr Schaggi und dr Zeeka ufe Petersplatz, zem ihri (Fräss-) Tour z'starte. Zem Ufwärme isch e Steak vom Jeffery's halt immerno s'Beschte. Und die Soose........mjam! Me isch denn bitzeli iibere Platz gschländeret, het sich die divärse Ständ e bitzeli aagluegt und derbi aber nie s'näggschte Ziel us de Auge verlore: dr Stand vom Jenzer mit sine herrlige Wirscht. Zweimol Kalbs- und eimol Buurobrotwurscht bittscheen. Dr Priis vo 6 Frangge isch absolut in Ornig, schliesslig sind die Fleischlattene au gresser als an andere Ständ. Zweimol Fleisch also scho zem Start, das schreit nach emene Dessert. Me blieb dr Schiine treu und fiehrt e Nutella-Berliner yy, genau wie im letschte Joor. Bitzeli e trockeni Gschicht, zem Glygg isch no Flissigkeit kauft worde. Das um die Zyt kei Fähri me fahrt isch no bekannt us em letschte Joor und so macht me sich ufe Wäg zer mittlere Brugg, denn scharf linggs ans Glaibasler Rhyufer aabe und knapp vor dr Kasärne wieder ins Landesinnere abbooge. Scho isch me uf eim vo de actionriichschte Plätz vo dr modärne Herbschtmäss. Grossi Bahne mit kreischende Meitli stehn do und tauche das Quartier, wo sunscht numme rooti Lämpli kennt, inne spektakulärs Farbemeer. De exotische Gaschtarbeiterinne derfti die kinschtligi Helligkeit sehr unagnähm sy, d'Anonymität isch grad wäg in de dunggle Stroose. Highlight fiir d'Deppe isch do ganz klar dr Schwänkgrill mit sine sensationelle Spiessli. Kompliziert zem ässe, erscht rächt wenn de no ebbis vo dr Soose wotsch, aber eifach fein. Und während em Ässe bietet sich eim no e spektakulärs Pfärderenne zem zueluege. Härz, was willsch meh! E wietere Fuessmarsch stoht aa und me goht Richtig Mässplatz. Friener s'Zentrum vom herbschtlige Spektaggel, in de letschte Joore aber als wie meh sterilisiert. Schad um dä grossi Ruum wo do verschänggt wird, in Kiirzi isch au uf dr Roosetalalaag nit me los. Letscht Joor hets vor de Mässehalle no e Backfisch gäh, dasmol händ die Norddytsche dr Wäg uf Basel aber nit gfunde. Somit hets numme fiir e Käässchnitte glängt. Allerdings het sich dr Schriiber vo deere e bitz meh erhofft, sie isch em e bitz z'faad gsi. Näggscht Joor bitz meh Gäld in d'Hand näh und e Piadina iine zieh. S'isches wärt. Dr näggschti Halt isch ufem Minschterplatz plant gsi. Dert isch s'kulinarische Aagebot aber e so stargg aabe gfahre worde, dasses eigentligg numme e Heefligkeitsbsuech worde isch. Zielgenau isch me ääne wieder aabe gloffe und het dr Seibi aavisiert. Alles klar zem Grande Finale. E Crêpes vom Barfi, dass isch dr Abschluss. Doch nimm wie letscht Joor mit Nutella drin, dä isch nämlig bitz maschtig gsi, sondern numme no liicht mit Vanillezugger. Isch au fein und gits scho fiir e Schnägg. Dr Zeeka het sich denn allerdings dr Uuseforderig gstellt und het e Teigrolle mit Epfelmues gno.....är het dr Kampf bitter verlore. E grisseni Noht im Teig het em e Strich durch d'Rächnig gmacht und das feine Gschlabber ischem uuse gloffe. Jänu, näggscht mol gits wieder e Chance. Alles in allem isches e feine Oobe gsi, me het sich richtig dr Ranze kenne vollstopfe. An Stuehlgang vom näggschte Morge willi allerdings nit dängge. Bi däm Duurenand im Maage ka jo nit Gschiids uusekoh.

Autor: Schaggi

Kategorie: Deppenontour

zrugg