» Über uns

» FAQs

» Linggs

» Intärn

Einzelzytfahre Laufe - Delémont - Laufe (27 km) (11.07.2006, 16:36)

S'letschte Renne vor em WK und vor dr Summerpause. S'goht ins Laufetal. Fascht 30 km dr Kantonalstroos entlang uf Delémont und Aafangs Ortschaft kehre und dr gliich Wäg wieder zrugg. Das Renne findet in däm Joor zweimol statt, well d'Organisatore vom Zytfahre in Prattele leider kei Bewilligung me biko händ. Mer händ aber d'Quantität welle bibhalte, dorum jetzt halt die Doublette uf Delsbärg. Als erschts mol mit em Auto uf Laufe, dert ufe Parggplatz und s'Velo montiere. Dr Start isch uf dr andere Site vo dr Gmeind, bi dr Abzwiigig uf Kliilützel. D'Streggi het e paar fiesi Charaggterziig, so hets doch zweimol e pfiffegrade Abschnitt wo de immer Gegewind hesch und mit zwei Iiberfierige und einere Unterfierig kemme no harti Rythmusbrächer derzue. Do merggsch denn das de Oberschänggel bruuchsch. Wichtig uf däm Parcours isch, im Gägewind nit z'viel Kraft z'verpuffe. Do eim die stiffi Brise uf em Hiiwäg ins Gsicht bloose het, isch me rächt verhalte gstartet. Jo nit z'wiit fiire luege wenns graad wird, das demoralisiert numme. Denn dr Bahn entlang, bald kunnt d'Unterfierig, denn gohts nomoll oobe duure und mit Schwung in Richtig Wändepunggt. Dräie, und wieder hart aatrampe, jetzt miend die gspaarte Kräft uuse, mit Volldampf zrugg an Start. Grossi Schiibe, hinde ebbe dr 15er, stampfe, stampfe! Ganz klei mache uf em Länggerufsatz. Jedes Nasehohr reggt ein uf, s'isch nit aerodynamisch. Die erschti iiberfiehrig kunnt wieder aber vo dääre Site us kei Problem. Denn kunnt Liesbärg mit em Steibruch, dert gohts nomoll ufe. Zem Sattel uuse, wiene Dampfloggi uffepowere. Gschafft, jetzt numme no flach. Aber dr Velowäg isch nass, das brämst, also in dr Stroosemitti fahre. D'Auto händ kei Freud aber ich bi dä wo muess liide, nit die Heinis in de Blächschüssle. S'Ziel isch in Sicht. Aabeschalte, numme no mit em 13er trampe. Trampe, als gits kei morn me, als bruuchsch dini Bei nie me. Die letschte Meter, zem Sattel us, nomoll alles gäh und..........SPRUNG!! Im Ziel, usrolle, abeschalte, hindere luege, kehre und viel schnuufe! D'Zyt isch egal, s'Gfühl isch guet, dasch d'Hauptsach. Bisch wiedermol flott vorwärts ko. Vereinsintärn bini trotzdäm numme 4. worde. Immerhin eine gschlaage. Egal, ich bi fascht z'friede au wenn mi Zyt um 50 Sekunde z'hoch isch, s'Ziel wär gsi unter 50 Minute z'bliebe. Jetzt isch erst mol Pause und am 16. August gohts denn wieter mit em Bärgrenne Eptige - Oberbölche. Speziell dert isch dr Massestart. S'bliebt also no bitz Zyt zem Vorbereite. http://www.bhfm.ch/2006/lib/pdf/rang_18.06.2006.pdf

Autor: Schaggi

Kategorie: Sport

zrugg