» Über uns

» FAQs

» Linggs

» Intärn

Bärgzytfahre Dornach – Gämpe (5 km) (13.06.2006, 13:15)

E wunderscheene Samschtig Noomidaag isches. D'WM isch in vollem Gange, in Kürzi foht Ängland – Paraguay aa. Aber fiir mi heissts in Sattel stiege, dr zweiti Lauf vo dr Basler Hobbyfahrermeischterschaft stoht vor dr Türe. Diesmol s'Einzelzytfahre vom Schiessstand Dornach ufe zem Friedhof in Gämpe. 5 Knackigi Kilometer wo permanänt ufe gehn, mängmol stränger, mängmol weniger sträng. Nachdäm ich vo Allschwil uf Dornach gradlet bi und eso grad no d'Musggulatur ufgwärmt ha, hets mi z'erscht mol zue de Clubkamerade zoge. Mer händ grad e Tisch gfüllt denn obwohl mer bi wietem nit die Schnällschte sind, simmer doch eini vo de gröschte Fraktione wo jewiils an deene Renne an Start goht. Entsprächend wärde mer au immer griesst. Me kennt sich in dr Szene. Denn simmer vo dr Turnhalle ins Startgländ grollt, jede het no sini Startnummere miesse hole. Entgäge de andere Renne in dr Meischterschaft gits an däm Event en eigeni Startreihefolg, worum au immer. Uf all Fäll hani nit grad mit Routine glänzt woni als erschte an Tisch aane bi und mer mi Nummere gholt ha. Mit Schregge hani feschtgstellt dass mini Kamerade alli grad hinter mir starte, ich ha also vo dr erschte Sekunde aa die gsamti diräggti Konkurränz im Nagge. Wär scho mol so ebbis ähnliggs gmacht het weiss, wie unagnähm das isch. S'isch denn im 30 Sekunde-Rhythmus gstartet worde, am 4ehalb ab 5i isch mi Start gsi, drno die andere. Mi Taktik isch wie allewyyl die gliich gsi, numme nit z'schnäll starte. Am Aafang uf de erschte 500 Meter isches no relativ flach, do goht me gärn d'Gfohr vom z'stargge forciere yy. Also erscht mol gmietlig richtig Kilometersprint rolle. Nach dr erschte Kurve luegi mol zrugg well me do immer e guete Iiberbligg het iiber die wo hinter eim gstartet sind. Do gsehn ich doch tatsächligg wie die erschte 2 Verfolger scho hinter mir sind, dr Abstand betreit numme no ebbe 50 Meter. Katastrophe. Dr absoluti Super-GAU schiint fiir mi wohr z'wärde. Dassi nit grad unbedingt e Siegaawärter wurd sy isch mer klar gsi, aber dassi richtiggehend deklassiert wird isch mer denn doch z'viel gsi. Nach 1,5 Kilometer zieht dr erschti an mer verbi und es isch nit dr letschti gsi. Nit numme Teamkollege, au anderi, viel stärkeri Fahrer düüse duure. Das macht mer nüt, das isch no einigermasse normal. Aber dassi de eigene Lüüt in däm Maas nit nochkum isch doch e herbi Enttüschig. S'macht au sofort "klick" im Kopf und d'Moral isch wäg. Ab sofort heisst numme no "derbi sy isch alles" und entsprächend normalisiert sich d'Atmig und er Puls. Meh als d'Hälfti vom Bärg isch bezwunge und s'isch numme no ei Fahrer hinder mir, au vo Birsfälde. Eigentligg e sehr guete Bärgfahrer aber irgendwie laufts em hüt nit. Hinter ihm isch dr "Bääsewage" wo aazeigt das dr letschti Fahrer ufe kunnt. Jetzt mäldet sich dr Stolz zrugg. "Eifach nit vorem Bääsewage fahre" dängg mer. Die Schmach bruuchi nit au no. Die letschti Kurve kunnt. Verbi an dr Steiwand. Immer wieder dr Bligg nach hinde, wo isch dr ander. Är kunnt glaub nit nöcher. Trotzdäm nit nocheloh. Zem Wald us, no 200 Meter bis ins Ziel. Gegewind notierlig dert oobe, das macht jetzt brutal weh. Und denn ändlig dr Zielstrich. Gschafft, in jedere Hinsicht! D'Zyt isch schlächt, dr Rang katastrophal. S'nützt alles nüt. Bärgrenne sind nüm mini Domäne. Verbi sind d'Zyte woni in 18 Minute dr Gämpe uffe g'rast bi. Hüt gohts langsamer. Oder kunnts eines Tages doch nomoll? Me wird’s gseh. Aber jetzt regiert z'erscht mol d'Enttüschig. Näggschte Sunntig gits d'Chance zer Revanche. Einzelzytfahre iiber 27 flachi Kilometer vo Laufe uf Delémont und wieder zrugg. http://www.commcreations.ch/fotogalerie_vcd/

Autor: Schaggi

Kategorie: Sport

Letschti Änderig: 13.06.2006, 21:39 (Schaggi)

zrugg