» Über uns

» FAQs

» Linggs

» Intärn

23. DOT's Wednesday (02.04.2006, 21:17)

"Bim Yydräffen isch ys e digge Rauch entgege koo und es het ys fascht us de Sogge ghaue. Dunggli Gstalte mit Sunnebrillen und Huet sind uf uns zuekoo und händ ys mit me fascht unheerbaare Knurre härzlig yynebätte." Dr Quinto und dr Zeeka sind am Zyyl aakoo - dr Partyruum bim Joël und Diibidääbi isch ooni nennenswärte Zwischefäll erraicht. D Gaschtgäber laaden an Disch yy und me machts sich bequäm. Us Papiirguggene wärde die erschte Fläsche Fusel-Jack fiirezauberet, wärenddämm sich anderi am Bleeterliwasser vergryffe. Gäldchips wärde groosszygig verdailt und vor de Spiiler ufgstaplet. D Grawadde no e letscht mol gloggeret, dr Huet e glai diefer zoogen und d Sunnebrille uf allfälligi Schwachstellen iberbrieft. Alles klar - s ka loos go! Doch halt! Wie spiilt me das Spiil aigentlig? Weli Pokerart mache mer? Unden uffe, oben aabe, oder doch lieber Slalom? Und wele Chip het aigentlig wievyyl Wärt? D Scheffe sind gfrogt gsi, und sy händ nit entdosche. Als hätte die Herre das Kartespiil sälber erfunde, wirble sy mit "Full House", "Straight" und "Royal Flush" nur so umenand, dass au dr letscht Zeeka dr Iberbligg verliert. E Zeddel mues aanen und me foot nomol (ganz langsam) vo vornen aa. Jetzt aber, alles klar - s ka loos go! Die erschte jungfrailige Versiech glinge, und me ziet immer kräftig mit de andere mit. Do e "check", dert e "y glopf", und vo ganz äänen am Disch e "y verdopple, s deent aifach so gail!" Derzwischen immer wider e fuule Spruch und ainzelni klangvolli Deen us de ney erworbene und scho guet integrierte Naasefleete. Mit dr Zyt het me denn kenne gsee, wär die woore Spiiler sind, und wär nit mit Gäld umgoo ka. Dr Quinto het scho mol vorsorglig dr Notschlooffstell firn e Bewärbigsgspräch aaglytte. E ainzig hii und häär, mitbiete, iberbiete und Karte wäggschmaisse, so lang bis ain die gloorrych Ydee ka het, "all in" z spiile. Alles Gäld kunnt in d Mitti und die letschte Karte wärden ufdeggt. Spannig pur - alles oder nyt. Wenn sich dr Autor nit schwär dyscht, isch s Gligg zem Schluss em Diibi treu bliibe und är het dr Jackpot fir sich kenne verbueche. E verdiente Syyger! (Dr Bricht in Papiirform)

Autor: Zeekadeethee

Kategorie: Deppenontour

Letschti Änderig: 02.04.2006, 22:12 (Zeekadeethee)

zrugg