» Über uns

» FAQs

» Linggs

» Intärn

Reisebricht Racing Strasbourg - FC Basel (17.03.2006, 21:01)

E zugge in dr lingge Hand, e Gryff in Hoosesagg, und dr Zeeka druggt sy Handy ans Oor. Am anderen Änd isch dr Joël, wo sich scho sichtlig närvees zeigt. S isch kurz vor de zewai am Nomittag am 16. Meerze 2006. Dr Grund fir das haschtige Getue isch (wie kennts au andersch syy) em Zeeka sy Verspetig. Allerdings ka är dasmol wirklig nyt drfiir: d Schuld mues daasmol dr Proschtomat am Baanhoof draage. Egal. Kai Zyt fiir dummi Gschwätz, me hets jo bekanntlig bressant. Drum numme no schnäll iibere in Burger King, e BigKing XXL mit Spägg und ere Wälle Bommfritt go hoole, me will jo fir dr Bierusschangg grischtet syy. "Das goot mindeschtens no fympf Minudde", maint dr symbatisch Verkäufer hinter dr Theke, "dr Grill isch ebben usgfalle." Derzue maint d Kollegin näbedraa: "Aber göön sy doch iber d Strooss in Mäc, die händ sicher iiri Burger parat stoo." Y entschaid my denn aber fir e Päggli Poulet Nuggets mit SweetSour-Söösli – d Friddööse isch jo no gloffe... Im Stächschritt goots sofort wider uf die anderi Syte, zem franzees'sche Baanhoof. No kurz duur d Zollkontrolle (...) und denn in die alte Wääge vo dr benochbaarte Yysebaangsellschaft. S erschte Bier wird aagstochen und d Nuggets hinderebiige. Drzue wie immer fuessballbezogeni Gspröch und andere Smalltalk, bis mer denn ändlig in Strasbourg aakemme. Die frischi Luft loggt, und me beschliesst, ebbis z ässe und denn gmietlig zem Stadion z goo. Doch aimol mee, wie kennts au andersch syy, macht ys d Schuggerey e Strich dur d Rächnig. Wie zue Wältkriegszyte isch me abgfange worden und het sich in d Stroossebaan quätsche miesse. Kai Chance zem entkoo, me isch volländs usgliiferet gsi. Non e paar Minudde isch me denn wider usgstiigen und het dr Fuessmarsch zem Stadion aane unter d Fiess gnoo. Au do wider: wär het welle ebbis z Ässe kaufe, oder sich sunnscht vo dr Gruppe entfärne, isch sofort vo dr Bolizey ufghalte worde. Do nyt anders iibrig bliiben isch, sinn au mir brav mitgloffe. Vor em Stadion denn nomol e greesseri Warterei, ooni Wurscht-/Bierstand in dr neechi. Drfiir mit um so intressantere Lyt (d Gedangge vom Autor schwääbe grad bym Strumpfhoosemaa ume...). Und denn ändlig geend d Door zem Station uff... Ooni Problem wird d Kontrolle passiert und me macht sich uf d Suechi no guete Blätz. Wäärend däm die ainte iiri Bloose nomol gründlig lääre, steen die andere am ainzige (!) Stand aa, zem sich mit HotDogs yyzdegge. Stunde speter wird me denn au tatsächlig bedient und begit sich wider ind Kurve. Punggt säggsi isch es denn sowyt und dr Match foot aa. D Stimmig isch rächt guet und non em Träffer vom Eduardo wirds erscht rächt lut. Dr Match isch aigentlig scho entschiide, und me darf sich innerlig scho mol e glai freye. Laider hets am Schluss denn aber doch nit zue me Syyg glängt, aber dasch jo schlussändlig au glyych. Me isch schliesslig in dr näggschte Rundi! Also schnäll no dr Mannschaft zuewingge und denn aber schnäll, schnäll uuse go fyyre! Hoppla, Bier organisiere und aastoosse! Jäjä... Laider isch dusse scho wider d Schuggerey parat gstande und het sich fascht ins Höösli gmacht. Sy händ aber miessen yygsee, dass au miir irgendwenn wider haime miend, und so händ sy sich schlussändlig verzooge. D Masse bewegt sich jetzt wider zue dr Stroossebaan und druggt sich ins vyyl z glai berächnete Tram. E paar Gliggligi händs vorhär no gschafft, in Mäc z goo, und sich e faine Burger z ergattere. Die andere sind aimol mee ooni Verpflägig do ghoggt und händ sich d Büch ghebt vor Hunger. Bym Zwischehalt in Myllhuuse denn allgemaini Erlychterig: me het e gueti halb Stund Zyt, zem sich ebbis z schnabuliere z organisiere. Mer händ denn e nätte Asiate-Laade gfunde und ys mit Geträngg und Hamburger (?) yydeggt. No die letscht halb Stund im Zug, und me kunnt z Basel aa. D Fäns streemen uuse und geend haim. Auf mir verabschiiden ys vonenander und machen ys uf dr Wääg. Alles in allem e tollen und erfolgryychen Usfluug. Und wenn d Bolizey nit gsi wär...

Autor: Zeekadeethee

Kategorie: FCB/FCA/EHC

zrugg