» Über uns

» FAQs

» Linggs

» Intärn

21. DOT's Wednesday (15.03.2006, 23:18)

Back to the roots - dasch s Motto vom 21. DOT's Wednesday gsi. Zu de Wurzle zrugg - dert wo die ganzi Deppe-Mittwuchs-Träff-Schoose aagfange het. Dr intressierti Läser stigt schnäll: me redet vom Halleminigolf bim Baucenter. Fascht Punkt halber Nyyni z Oobe träffe sich zewai Deppe (Joël und Zeeka) zuen ere gmainsame Rundi Glai-Golf. Die räschtlige Deppe sind laider verhinderet gsi, was in ere spontane Schwyygeminute härzligscht beduurt worden isch. Mit dr Startnummeren ains het denn dr Joel zem erschte Schlag aasetze derfe. Kai Problem. Dr Zeeka (scho lyycht unter Drugg) ziet souverän noche. Die wytere Baane biete e Spitzekampf uf heggschtem Niwoo, und die aawäsende Zueschauer haltes kuum me us. Die erscht Hälfti goot mit knappem Vorsprung an Zeeka, aber dr Joël will nit ufgää. In ere paggende Ufholjagd schafft är dr verdienti Usglyych und ziet schnuerstraggs wyter. Em Zeeka ziddere d Händ und d Fiess, und dr Schwaiss druggt us allne Phore. Schlussändlig gwinnt dr Big Joe mit sagehafte drey Punggt vorsprung 57:60. Wär aber maint, dass dr Oobe mit däm Spiil scho gloffe wär, het sich guet tosche! Bi dr letschte Baan simmer nämmlig uf zwei kurligi Lyt gstoosse. Baidi mit Schnauz und emne glaine Büüchli. S het sich denn zem Gligg usegstellt, dass es kaini Schugger sind, sondern redgwanti, symbatischi Hobby-Vereins-Minigölfler. Die baide händ ys denn grad mol schnäll vorgfiert, wie mes richtig wurd mache. Mer händ denn sogar sälber no derfe iir Profimaterial aalänge und drmit spiile. Und me het miesse feschtstelle, dass s Material e riisen Unterschiid mache ka. Ob Glaskugele, Gummiball, Rohling oder Holz - dr erfaareni MGler het fir jedi Baan dr richtig Ball! Und hätte mer die baide nit bim Schwätze unterbroche, mer wurden ys woorschyynlig immer no Gschichtli und Tipps miessen aaloose...

Autor: Zeekadeethee

Kategorie: Deppenontour

Letschti Änderig: 20.03.2006, 20:12 (Zeekadeethee)

zrugg