» Über uns

» FAQs

» Linggs

» Intärn

18. DOT's Wednesday (24.02.2006, 11:06)

Me schriibt dr zweiezwanzigschti Daag im zweite Monet vom zweiduusigundsäggste Johr. Abgseh dervo isch Mittwuch. Stolzen Hauptes bewege sich 4 Gentlemen uf ihrne edle Fahrgstell in richtig vietnamesischi Billardhöhli. Vor em Gemäuer stoht au scho dr 5. Wägbestriiter und me due zämme dr Iitritt wooge. Verteilt uf zwei Tisch het me denn mit em Wettstriit aagfange, folgendi Paarige händ um Ruhm und Ehre kämpft: Dr Schaggi zämme mit em Zeeka gege dr Quinto und am zweite Tisch dr Diibidääbi gege dr Joël. D'Sieger us de jewiilige Begägnige händ sich denn derfe gegenenand mässe. Es isch e flotts Queue gschwunge worde und s'het me als numme 1 Kunschtschuss gäh, allerdings meischtens vo de gliiche zwei (nei, ich sag jetzt nit wär!). Uf all Fäll isches rächt usgliiche gsi, kennt me ämmel sage. Am 9i het denn leider dr Quinto miesse go schaffe, aber s'het em wohrschiinlig nit gschadet! Die andere 4 händ denn e loggers 2 gege 2 gmacht, s'Resultat isch aber vermeintlich vorusschaubar gsi! Und so isches denn au ko! Dr Diibidääbi händ ihri langjährigi Billarderfahrig knallhart in d'Woogschale gworfe und ei Kugele nach dr andere versänkt. Em Zeeka und em Schaggi isch nur no s'leere Schlugge iibrig bliibe. Zer Ehrrettig derf me aber sage das die zwei wenigschtens mol mit einere Kugele im Vorsprung gsi sind. S'het notierlig e Rematch gäh. Dr Schaggi haut mit em Eröffnigsstoss grad mol eine iine und bloost so zem Hallali! Doch em Zeeka schlottere ab em pletzlige Vorsprung uf eimol d'Bei. Dr Diibi und dr Joël hole uf, doch dr Match bliibt spannend. Total unerwartet startet denn dr Zeeka aber e totali Verzwiifligsoffensive und legt grad schnäll e scheeni Serie aane, was de Ussesiiter e aagnähms Polschter verschafft. Jetzt isch dr Match im Gang und wenn dr Schaggi d'Närve besser bhalte hätt, wär das Spiel scho friener entschiede worde. So hets aber nomoll e Exploit bruucht vom Zeeka, damit dr Diibi und dr Joël nit wieder verbi zooge sind. Die zwei händ kämpft wie jungi Leue, doch uf eimol isch Matchkugele gsi fiir d'Underdogs. Dr Schaggi (usgrächnet är) setzt aa, zielt uf d'Bande, spannt d'Arschbagge aa und git em Bälleli e wohldossierte Schlag mit em Stosswärggzüüg. Die schwarzi 8 knallt s'erscht mol gege d'Bande, kunnt zrugg, knallt nomoll an d'Bande, verliert aber immer meh an Fahrt, stüürt uf d'Mitteldäsche zue, immer langsamer, "Klonk" "Schäpper" "Däng" "Buum", dinne isch sie. D'Ussesiiter händ d'Sensation gschafft, knapp aber dr Diibidääbi und dr Joël sind gschlage gsi. Uf eimol händ sich Szene abgspielt wo so voller Emotione gsi sind, dass me muess derbi gsi si, sunscht ka me das nit nochvollzieh. Wildfremdi Mensche sind sich umme Hals gfalle, dr Vietnames het e Lokalrundi gschmisse. Dr Sadam und dr George W. händ sich küsst und sogar dr Mond het glächlet! D'Wält het fiir dr Augebligg vo däm Stoss d'Luft aaghalte und wär ab dr Spannig fascht kolabiert! Es gheert aber au de ehrvolle Verlierer dr Respäggt zollt, sie händ e grossartigi Schlacht glieferet. Erscht durch das isch dä Sieg so wärtvoll worde. D'Redaktion gratuliert beidne Teams zue dere grossartige sportliche Leischtig. Mer hoffe, das me so grosse Sport öfter z'gseh bikunnt! Näggscht Wuche gits wieder e Mittwuch, wie s'Programm usgeht isch bis Redaktionsschluss nonig bekannt gsi. Dr Schriiber

Autor: Schaggi

Kategorie: Deppenontour

Letschti Änderig: 27.02.2006, 20:49 (Zeekadeethee)

zrugg