» Über uns

» FAQs

» Linggs

» Intärn

15. DOT's Wednesday (02.02.2006, 14:39)

Kalt, seer kalt ischs gsi, wo sich dr Joël und dr Zeeka troffe händ. Trotzdäm het me sich ufd Hämoroyydeschauggle gsetzt und isch in Richtig Schütze gfaare. Dr Grund isch gsi, dass dr FCB wiider mol e Mätschli usdrait het: E Teschtspiil gege Woole us dr Challenge League. Vor em "Stadion" sind d Wello parkiert worden und me het mit em Zubi no e glai Schwätzli mache kenne. Obwool är vrsproche het, är wurd ys d Geppel unterdesse butze, simmer denn nonem Match bitter entdyscht worde: Zubi wägg, Drootesel dräggig! Egal, me isch jo wäg em FCB do, nid woor? Uf em Wäg zum Yygang trifft me denn grad no dr Diibidääbi aa - mer sind also komplett. S Spiil het graad aagfange, wo mer dur d Kontrolle duuregschliche sind. Erstuunlig vyyli Zueschauer sind aawääsend, obwool s wirklig schweinekalt gsi isch. Unseri glaini Gruppe het sich denn dur die Masse duurekämpft und sich e Blatz uf Stroofruumheechi ergatteret. D Sicht isch einigermaasse guet gsi, und me het prima kenne em Louis, Reto und David zueloose, wobyy dr Reto aigentlig nid vyyl z saage gha het. Beschtens isch au dr Bligg uf unsre ney Abweerscheff gsi. Dä Maa het sy Sach wirklig guet gmacht, und d Mitspiiler und au d Gegner voll im Griff gha. Die zwaiti Neyvrpflichtig, dr Japanees, hämmer laider nit so guet gsee, do är jo uf dr andere Syte gspiilt het. Aber lut Zyyge wo gegeniiber gstande sind het au är sy Sach guet gmacht. In dr Halbzytpause simmer denn schnäll uf die ander Syte go schwätzle, bevors denn au scho bald wiider mit Fuessball wyter gangen isch. Dr FCB isch jetzt no dominanter worden und Woole het grad gar nyt me aanebrocht. Trotz däre Iberläägehait sind aber langi Zyt kaini wytere Gool gfalle. In dr 77. Minute denn aber ändlig s 2-0 dur dr Delgado, wo e Penalty (dr Caicedo isch gfoult worde) mee oder weniger sicher vrsänggt het. Jetzt händ alli numme no gwartet, bis dr Schiri abpfyfft. D Zeeche, d Händ und au d Oore sind gfroore gsi. Schlusspfiff. D Deppe stürmen uuse, seggle zum Wello und trampe schläunigscht heimeszue!

Autor: Zeekadeethee

Kategorie: Deppenontour

zrugg