» Über uns

» FAQs

» Linggs

» Intärn

13. DOT's Wednesday (19.01.2006, 13:04)

Pinguin – bi däm Wort dänggt dr normali Durchschnittsbürger z'erscht an Zolli, Nord- oder Südpol, Yys, velicht Linux (wenn me sich uskennt) oder an e Maa im Frack. Doch das alles het gar nit mit em 13. DOT's Wednesday z'due gha. Dr Diibidääbi, dr Joël, dr Schaggi und dr Zeeka sind nämlig ganz gmietlig und total relaxed e Bierli go dringge, und dass im Pinguin, dr wohl bekanntischte Import-Bierbeiz in dr Stadt Basel. Schauplatz vo däm Gscheh isch also die unschiinbari Beiz bim Spaletor gsi. D'Atmosphäre sehr speziell, wenn me e Glasphobie het derf me nit mol dra dängge dert iine z'goh. Dr Beizer het nämmlig kurzerhand sini sehr umfangriichi Bierglasssammlig an d'Deggi ghängt. Vom Flütli bis zem 3 Liter-Steikrueg isch alles do gsi. Me het sich also d'Karte (e digge Ordner!) bringe loh mit de divärse Biersorte. Scheen und suuber sortiert nach Länder und immer mitere kurze Beschriibig zem Gschmagg und mir dr original Etigedde. E Maturarbet gseht au nit scheener us! Die 4 Herre händ sich entsprächend Zyt gloh bim schneugge, me will jo e Bier dringge wo eim au schmeggt. Wo denn ändlig alli gfunde händ was sie händ dringge het me bstellt. Die erschti Rundi isch do als kurze Überbligg ufglischtet: Diibidääbi Mongozo (Afrika) 3,5 % Alkohol s'Bier wird inere Kokosnusshälfti serviert, nach dere exotische Frucht schmeggts au, das git em e siessligge, milchigge Huuch. Joël Brahma (Brasilie) 4,8 % Alkohol sehr schwer zem iischätze das Bier, s'isch ungwohnt gsi, het e liichte Hang zem Siesse gha und isch doch süffig gsi. Schaggi Barbär (Belgie) 8 % Alkohol sehr starggs Bier, zu de Zuetate ghert au Honig, was me sehr guet uusegschmeggt het, entsprächend siess isches au gsi. Zeeka Floreffe (Belgie) 8 % Alkohol bittersiesslich, e dunggels Bier immene buuchige Glas, sehr feini Nase. Me het denn notierlig die Gläser ummegäh damit alli händ kenne probiere und d'Meinig derzue abgäh. Grundsätzlich het me aber kenne sage, das keine dernäbe griffe het mit sinere Wahl, es händ alli 4 Bier uf ihri eigeni Art sehr fein gschmeggt. Zyt het me sich gno, schliessligg wird sone Tropfe nit gstiirzt wiene normal Fäldschlessli oder ähnligs. S'isch denn iiber allerhand gschnuurt worde, Politik, Sport, Autos, Fraue etc etc. und immer e Schlüggli Bier derzue. Me het sich sehr guet kenne unterhalte, d'Beiz isch bis uf 4 anderi Gäscht nämmlig leer gsi. Denn isches scho losgange mit dr zweite Runde. Wieder het me dr Ordner fiire gno und duure blätteret bis me ebbis passends gfunde het. S'het eim kenne sy dasses diesmol schnäller gange isch, kennt aber au e Iibildig sy. Uf alli Fäll isch diesmol Folgendes uuse koh: Diibidääbi Adelscott (Frankriich) 6,6 % Alkohol e bitters Bier, sehr rauchig nachem aabeschlugge, isch mit Malzwhisky braut worde. Joël Steinlager (Neuseeland) 5 % Alkohol e charaktervolls Bier wo no eher an die normale Lagerbier wie mirs kenne anne kunnt, sehr klar. Schaggi Gordon Highland Scotch Ale (Schottland) 8,6 % Alkohol brutal siesslich, absolut fein und "lovely", eifach nit zwei siessi Bier hinterenand. Zeeka Gwiniz Du (Frankriich) 5,4 % Alkohol s'falsche Glas derzue, sehr schad aber verschmärzbar, s'Bier schmeggt mild und isch dunggel, kunnt no derzue dasses e Weize isch. Me het sich also wieder e bitz schläuer gmacht im Beriich vo de Wältbier. Au in andere Länder gits ganz feini Säftli wo me nit derf verpasse. Trotzdäm isch nach deene zwei Rundene s'Budget verbruucht gsi und me het sich ufe Heimwäg gmacht. Nach däm viele Bier het me sich denn no schnäll entschiede, dass me e Lamatschun (Phonetisch) iineschiebt, s'Dönerfleisch isch drum ebbe scho fertig gsi. Jänu, mol ebbis neys probiere, s'isch ämmel sehr fein, aber au e bitzeli pikant gsi. Nit sehr spannend, dä 13. DOT's W. oder? Aber kulturell hochstehend, das muess me au gseh. Näggschtmol krachts denn velicht wieder, me wird’s gseh. Sicher isch aber, das au am näggschte Donnschtig wieder e Bricht iiber d'Ereignis uf dere Siite z'finde wird sy! Bis denn dann. PS: iiber irgendwelchi betrunkene Källner wo Fiiroobe gha händ diend sich alli Beteiligte heeflig usschwiege!

Autor: Schaggi

Kategorie: Deppenontour

zrugg