» Über uns

» FAQs

» Linggs

» Intärn

11. DOT's Wednesday (05.01.2006, 08:59)

Tatort: Allschwil. S'isch genau 19.00, aber uf d'Sekunde! En einsame Inlineskater mit verkehrt aagleggter Baseball-Kappe und emene schwarze Kapuze-Pulli zieht sini Kreis uf em Bachgrabe-Parggplatz. S'Liecht vo de Latärne erhällt dr ganz Platz, s'herrscht trotzdäm e düschteri Atmosphäre. 2 Autos sind parkiert, d'Stroos numme mässig befahre. S'isch kalt. Do kemme vier Type dr Stroos entlang. Sie laufe. Händ komischi langi Holzstögg in de Händ, d'Bekleidig isch nit alltagstauglich, sie luege finschter. Sind die nätt? Sie gehnd zem Skater aane. Gschwätzt wird nit, jede weiss was är z'due het. Jede kennt sie Ufgoob! D'Skates wärde montiert, Schutzusrüschtig derf au nit fäähle. Alles klar, denn los! Ball kunnt, und denn grad Pass, Pass, Steilpass, Spurt, Brämse? Nei, könne nit alli! Also Kurve und grad wieder Pass. E kleins Dribbling (oder wie me das nennt) und wieder e Zuespiel ufe Kolleg. Eine, zwei usloh, dr dritti isch Ändstation, egal, s'het 2 Bäll. Grad wieder ein an dr Kelle. Tempo, Tempo, dr Schweiss muess ströme. Denn schnäll Pause. Wasser tringge muess me au zwischedrii. Pletzligg isches heiss. Guet so. Wieter gohts! Querpäss, Doppelpäss, Steilpäss, vereggti Päss, s'ganze Repertoire wird duuregno. Kleini Checks, Stürmer gege Verteidiger. Kombinatione. Zwischdri rieft eine "HE!" und will dr Ball. D'Rädli rolle, d'Stögg kratze am Bode. "KNAGGS"!!! Schuffle abbroche. Kei Stress, näggschte Stogg. Wietermache, wietermache. Derzwische immer wieder Pause, dr Rugge seit Hallo, s'Knüü mäldet sich, alles egal. Hauptsach em dämliche orange Bälleli noche. Mit der Zyt duet mes hasse. Die Sau rollt immer no und sälber fählt eim dr Schnuuf. Aber kämpfe muess me. Laufe, skate, rolle, fahre, hauptsach an Ball aane, Bägghändpass, bitz hochnäh, Schuss. Quinto uf Diibidääbi, dä grad wieter em Schaggi. Dr Schaggi fascht blind em Zeeka und dä schigg dr Joël. Sehr guet, s'lauft und wär dr Ball nit het, isch trotzdäm in Bewegig. Schnäll schwätze, nit lang. Denn kunnt wieder e Pass. Oje, stargg, hindedrii. Gas gäh. Puh, und jetzt? Wieder zrugg spiele. Schnäll muesses goh! Pause. Sitze. Wärs bis do aane nit gmerggt het: d'Deppen sind go Inlinehockey spiele. Und e absoluts Novum: alli 5 sind aawäsend gsi. Sensationell, Applaus bitte! Uf alli Fäll händ die begnadetere Spieler de weniger Stargge zeigt, was me mit däm Bälleli alles ka aastelle. Het Spass gmacht zem zueluege, aber au zem sälber spiele. Dr eint oder ander wird sicher no gwissi Partie vo sim Keerper besser gspüüre am Donnschtig, aber das macht nit, dass isch jo au ganz guet so! Nach 2 Stund het me denn Schluss gmacht, 1,5 Liter Schweiss het me sicher verlore, wenn me richtig dra isch! Ob jetzt au wirgligg alli parrat sind, wird sich am näggschte Zyschtig zeige, wenn dr Schaggi und dr Zeeka ins Training vo dr Baloise iistiige. Trotzdäm isch das e Sport, wo me sicher muess wieterverfolge. Und s'Wichtigschte vom ganze Oobe: s'het keini Verletzige gäh! Bis zem 11. Januar!

Autor: Schaggi

Kategorie: Deppenontour

zrugg