» Über uns

» FAQs

» Linggs

» Intärn

10. DOT's Wednesday (29.12.2005, 08:39)

Dr Jubiläums-DOT. Zem zähnte mol träffe sich d'Deppenontour amene Mittwuch ums mitenand glatt z'ha. S'het zwar kei speziells Feschtprogramm gäh, luschtig isches aber allemal gsi. Doch dr Reihe noch. Dr Diibidääbi het sich d'Freiheit gno und dr Oobe in Damegsellschaft verbrocht, die räschtliche 4 Deppe händ sich bi deere Saukälti uuse gwoogt und sind in Richtig Vitis am Bachgrabe gfahre. Dert isch s'Ziel gsi, während 60 Minute Vollgas-Badminton z'spiele! Me gseht, au sportlich sind sie no aktiv, die Herre. "Court 3" het dä nätti jungi Herr am Empfang gseit, und me isch sich go umzieh. Das me derbi wiedermol gmerggt het, wär öfter in Sporthallene aazträffe isch, bliebt e Randbemerkig. Aber schwarzi Sohlene ghöre eifach nit in e Turnhalle. Denn isches losgange. D'Paarige, wo nit veränderet worde sind, händ gluutet: Quinto/ Zeeka gege Joël/ Schaggi. Tönt jo öbbe gliich wie Lendl/ Becker gege Connors/ McEnroe! Das ganze isch sehr usgliche verloffe, kei Mannschaft het im Verlauf vo deere Stund kenne entscheidendi Vorteil gwinne. Umso interessanter isches aber gsi. Do alli 4 in voller Äggschen gsi sind und keine e Pause bruucht het, isch leider dr photografischi Dail z'kurz ko. Somit isch dä Oobe nit bildlich dokumentiert. Aber s'git wohl Schlimmers. D'Halle het sich langsam aber sicher gfüllt und s'isch au dr eint oder ander Spieler drunter gsi, wo die Sach ächt im Griff het. Was aber nit heisst das bi de Deppe numme blödlet worde isch. Im Gegedail, dr Schweiss isch gloffe und s'het erstuunlich viel intensivi Ballwäggsel (Fääderewäggsel?) gäh. Dr Ergiiz het sich zwiischedrii bim einte oder andere bemerkbar gmacht, s'isch aber immer kollegial bliibe. Nach dere Stund sind denn alli no erstuunlich frisch gsi, dr Zeeka het sich no mit em Joël e packends 1 gege 1 glieferet, derno händ au die zwei gschwitzt. Schnäll uffe in d'Kabine und umzieh und scho isch me in dr Beiz gsässe und het sich em Flüssige zuegwändet. Doch hoppla, was gseht dr neutrali Bsuecher? Händ die 4 ebbe e Bier vor dr Nase? Nei, schliesslig sind das alles Sportler, me isch entsprächend bi Cola, Yystee und Mineralwasser bliebe. Gege die viertel ab 9i het me denn dr Oobe beändet, einzig d'Spekulatione um dr Musggelkater vom näggschte Daag sind no besproche worde, bevor me sich denn im wildeschte Schneesturm, wo Allschwil je gseh het, uf e Heimwäg gmacht het. E sportliche Oobe het eso sie Änd gfunde.

Autor: Schaggi

Kategorie: Deppenontour

zrugg