» Über uns

» FAQs

» Linggs

» Intärn

Schaggi's DOT's Wednesday (15.12.2005, 09:18)

Mittwuch, 14. Dezämber 2005. Dr Schaggi isch elai. Kei Schwanz do, wo mit ihm wurd dr Deppen-Oobe begoh.Dr Quinto isch fiir e paar Dääg uf Berlin und dr Räscht uf Rom, an UEFA-Cup Match vom FCB. Är isch ganz elai. Dr Schaggi isch elai. Är isch e bitz druurig. Är luegt dr Match im Färnseh, mit Fryndin und Familie. Aber es isch nit s'gliiche. Keine wo mit em Stimmig macht vor dr Glotzi. Är muess sich ganz elai ufreege, het ganz elai e halbe Härzinfarkt. Är trinkt Yystee zem Match. Ganz elai. Dr Schaggi isch elai. Au wenner ufs WC goht, isch nit wie im Stadion eine links und eine rächts vo ihm. Är isch au elai wenner in d'Kuchi goht, s'het au do keini Lüüt wie am Wurschtstand im Stadion. Är kunnt grad dra, muess nit aastoh. S'isch jo au niemmer do wo kennt vor ihm stoh. Är isch elai. Dr Schaggi isch elai. Zwischedrii duet är em Quinto e SMS mit em Zwischestand uf Berlin schicke. Är schriibt s'SMS ganz elai, s'isch jo niemmer do wo mit em kennt schriibe. Är freut sich au ganz elai, wo Stroosburg dr Usgliich schafft und dr FCB dangg däm wiiterkunnt. Dr FCB hets nit elai gschafft, aber Glygg ghert derzue. Dr Schaggi weiss das, är weiss das ganz elai. Wo dr Schaggi ins Bett goht (nit elai!), dänggt är sich, dass derf nie meh vorkoh, dass är ganz elai isch, denn das isch nit scheen! Denn het dr Schaggi gschloofe. Und gschnarcht. Ganz elai!

Autor: Schaggi

Kategorie: Deppenontour

zrugg