» Über uns

» FAQs

» Linggs

» Intärn

7. DOT's Wednesday (08.12.2005, 11:33)

Fuessball, Fuessball, Fuessball.......und grad nomoll Fuessball. Das isch s'grosse Sujet gsi vom Deppen-Mittwuch in dr 49. Kaländerwuche vom 2005. Johr nach Geburt Christi. Wenn jetzt aber eine s'Gfühl het, bi deene Temperature wo dusse herrsche, händ sich die drei aawäsende DOT an die frischi Luft getraut, denn het är aber ächt e Rad ab. Nene, wär uns kennt weiss, dass mer kreativer sind. Punggt Nüünzähni drissig isch gsi (fünf Minute z'spoot!), wo dr Zeeka dr Schaggi abgholt het. Me het sich in volli Fuessballmontur gworfe, vom Fuessballshirt bis zue de Schienbeischoner und de Stülbe isch alles aawäsend gsi, dr Goali het sogar d'Händsche aagha! Dr Stirmer isch denn mit em Kiiper zem Joël heime iigloffe, dert het me sichs gmietlig gmacht in dr warme Stuube. Dr Zeeka het dr Laptop aagschlosse, damit me in aller Rueh ka uf Sportradio.ch s'Meischterschaftsnoochtragspiel Neueburg Xamax gege dr FC Basel uf dr Pontaise in Lausanne loose. In dr Zwischezyt het dr Schaggi sich no schnäll enere andere Sportart gwidmet und e Hockeyusrüschtig aaprobiert. Nachdäm dr diggi Arsch in dr Hose gsi isch het me kenne sage, dass alles passt und enere Inlinehockey-Karriere vom Schaggi bi dr Baloise nit im Wäg stoht. Me freut sich ufe Januar! Zrugg zem Fuessball: dr Laptop isch aagschlosse gsi, jetzt het numme no miesse d'Playstation mit em ältischte Game us dr FIFA-Reihe wo me gfunde het usrüschtet wärde, denn hets au scho kenne losgoh. Immer scheen 2 gege 1. D'Resultat sind mehrheitlich usgliche gsi. S'isch allerdings z'erwähne, das dr Zeeka in dr Halle ächt guet druff gsi isch. S'beachtenswärte 6-3 zwische Paris SG (Zeeka) und em FC Barcelona (Joël + Schaggi) wird is no lang in Erinnerig bliibe! So het me sich also dr Oobe an de FIFA-Spieli erfreut und näbebii het dr FCB frisch und fröhlich gege Xamax mit 2-3 verlore. Wie in alte Zyte halt. Das dr Herr Fetscherin vom Sportradio e absoluti Närvesäägi isch, muess do wohl nit speziell erwähnt wärde. Eifach e Katastrophe, wenn me bedänggt, wie friener no am Radio kommentiert worde isch. Dä het also glattwäg em Wolf-Dieter Poschmann und em Werner Hansch uf em FIFA 98 no Konkurränz gmacht! Zem Abschluss vom Sportoobe het me denn nomoll s'Genre gwäggslet und isch zem Rennfahrer mutiert. S'kultige Spiel "Micromachines" isch no iigleggt worde und het ämmel de meischte Spieler sehr viel Freud bereitet. D'Krone goht ganz klar an Joël, wo sini johrelangi Erfahrig zeigt het. Em Schaggi isch do numme no s'Stuune bliebe, die fetti 0 griegt är so schnäll nit wäg! Dr Oobe isch denn au scho wieder viel z'schnäll verbi gsi und me het sich ufe Heimwäg gmacht! Me danggt em Gaschtgäber fiir die feini Bewirtig mit Salzstängeli und Chips. Näggscht Wuche sind die meischte Deppen in Rom, eine hauts uf Berlin und dr letscht hebt d'Stellig in Schwellheim. Bis zem näggschte Mol!

Autor: Schaggi

Kategorie: Deppenontour

zrugg