» Über uns

» FAQs

» Linggs

» Intärn

6. DOT's Wednesday (01.12.2005, 12:24)

Spannig, Iiberaschig, Närvekitzel.......das sind d'Schlagwörter fiir dr 6. Deppen-Mittwuch. Usser em Korporal Diibidääbi, wo unser Land muess beschitze, sind alli Deppen aawäsend gsi, sogar dr Quinto isch uf ussdriggligi Iilaadig vor em schaffe no schnäll verbi ko. S'het also (wirgligg?) niemmer gwisst, was an däm Oobe genau lauft, usser notierlig dr Schaggi, wo das Ganze organisiert het. Träffpunggt isch denn au im GMW 57 gsi, bevor me sich uf e Wäg gmacht het an Bestimmigsort. Klar isch einzig gsi, dasses nit wit isch und dr eint oder ander het sich sicher scho sini Gedangge zem wietere Verlauf gmacht! Me isch denn circa 300 Meter wit gloffe bis me schlussändlig bim Zeeka vor dr Türe gstande isch. Grossi Verwunderig het nonig g'herrscht in dr Gruppe, fiir eine isch sogar scho alles klar gsi. Nach sine Vermuetige isch es nit weniger als logisch, das mer hüt Oobe d'Deppen-Krawatte, wo scho sit emene Zytli in Uftraag gäh worde isch, präsentiert kriege wärde. Dä Depp het eifach alli versteggte Hiiwiis zämmegrächnet und isch zue däm Ergäbnis ko. Was jedoch am meischte erstuunt: sini Erklärige sind sehr plausibel gsi. Jedoch het au är miesse enttüscht wärde, s'kunnt nämlig erschtens anderscht, und zweitens als me dänggt. Die vier Nase händ also in dr Stuube Platz gno, s'isch e Fläsche Sekt g'öffnet worde und dr Schaggi het e vielbeachteti Reed gschwunge. S'het nämlig no ebbis z'verkünde gäh: d'Basler Versicherige händ sich kenne duureringe, em Schaggi e Feschtaastellig z'gäh. Somit isch e wiitere Depp versorgt, was das aagoht, bliebt fiir dr Momänt no eine iibrig. Denn isches also los gange. S'Versteggspiel isch verbi gsi, me het ändlig kenne d'Karte ufe Tisch lege, d'Hose aabe loh! D'Deppenontour händ e neyi Website, und was fiir e scheeni. Dr Zeeka het fascht 2 Mönet amene neye Heim im Web baschtlet, dr Schaggi het en mit viel leere Wort probiert z'unterstitze. Aber dr ganzi Ruhm ghert em Jüngschte vo dr Gruppe, är het sich wirgligg sälber iibertroffe. An dere Stell nomoll e ganz grosses Merci an unsere Webmaster, das isch ganz grosse Klasse gsi! Dr Zeeka het denn die verschiedene Applikatione vo dere Site no erklärt, me derf sich uf e lebändigi und hoffentligg immer aktuelli Page erfreue, s'bruucht aber d'Mitwirgigg vo allne. Dr Quinto het sich denn us em Staub gmacht, dä armi Hund het no miesse go schaffe. Die andere drei händ sich no bitz im Internet vergniegt und dr Aafang vonere Doku gluegt, viel meh isch aber nimm gloffe im Hause Zeeka. Leider isch d'Mamme Deethee mit de Wiehnachtsguzzeli nonig sowit gsi, dass me scho hätt kenne deguschtiere. S'het ämmel guet usgseh was sie gmacht het! Denn hets gheisse, auf die Räder, s'isch in Richtig Switch gange, no schnäll e Bierli go näh. Dr Laade isch wie immer gähnend leer gsi, also hets gnueg Platz gha fiir d'Deppen. Me het sichs an dr Bar bequäm gmacht und e Grosses vor e Kopf stelle loh. Bi agnähmer Hintergrundmusigg het me sich denn kenne iiber Gott und d'Wält unterhalte, Zuekunftsplän schmiede und Komplott plane. Nach em zweite Bier isch denn aber fertig gsi, s'isch schliesslig scho gege die halb 12i gange, und dass amene Mittwuch! Wieder uuse in die kalti Nacht und ufs Velo. Me het sich ufe Heimwäg gmacht. E sehr gmietlige DOT's Wednesday isch duure, näggscht Wuche spielt dr FCB in Lausanne gege Xamax. Was genau lauft wird me gseh.

Autor: Schaggi

Kategorie: Deppenontour

zrugg