» Über uns

» FAQs

» Linggs

» Intärn

Grillparty bim Zeekadeethee (Deppen meet Beat) (28.06.2003, 00:00)

Die ganzi Sach isch relativ spontan entschtande. Am Friitig z'oobe het uns dr Zeeka brichtet, dass sini Eltere am Samschtig morge in d'Ferie faahre, und do isch es doch uff dr Hand glääge, dass mir das irgendwie zu unserem Vorteil händ miesse kehre. Also hämmer uns entschlosse, e chleini Grillade im Garte hinter em Huus z'mache. Do d'Elsässer just an däm Daag in d'Ferie sind, händ sich numme vier vo uns zum grille iigfunde. Luschtig isch es aber notierlig trotzdäm gsi. Mehr händ is also Punggt siebeni am Oobe im Grabemattwäg 19 iigfunde. Dr Quinto und dr Zekka händ sich intensiv mit em aafüüre ussenander gsetzt während däm sich alli andere Aawäsende ab dr botene Show amüsiert händ. Brennsprit isch im Hause Züger jetzt emmel keine me vorhande. Nach emene Zytli hets denn doch no klappt, s'Füür het gfacklet, d'Gluet het glieht und s'Partyfässli isch aazapft worde. E praktischi Sach, wo die cheibe Rhyfälder do wieder uff e Märt brocht händ. Numme chalt wird das Fass nit! Wommer denn ändlig e scheeni Gluet gha händ, hämmer die ganz Fleischwaare-Abteilig emol uff e Grillroost gheit. Iibrigens no e glaine Tipp: Wenns under em Fleisch e Alubödeli het, denn söll me dass drunter lo, dass isch nämlig zum grille dänggt (gäll Qunito)! Eso wird dä Wällesittich au nit schwarz iberem Füür. Trotz anderhalb Santimeeter digger Kohleschicht hämmer is uff die fleischbehangene Chnöche gstürzt und ummegnaggt, was das Zeug hält. Dr eint oder ander het nochhär doch ziemlich kannibalisch ussgseh. Wo dä Vogel denn verputzt gsi isch, sind d'Merguez (?) dra cho. Langsam hämmer aber gmerggt, dass mer sehr grosszügig iigchauft händ. Nach em dritte Gang und dr zweite Gugge Chips isch denn fertig gsi, es het is fascht dr Ranze verjagt. Fiir unseri Lady isch dr gmietlig Oobe denn leider scho wieder verbii gsi, d'Schuel het gruefe und so het si heim an PC miesse. Jetzt isch es also numme no an drei Deppe ghange, d'Fahne uffrächt z'halte. Me derf saage, mer händ alles gäh. Unterstützt vo sympathischer Musigg uss dr huuseigene Soundaalag simmer gmietlig im Gärtli gsässe und händ, wenn immer meeglig, luuthals mitgsunge. Und als ob das nit scho gnueg gsi wär, isch unverhofft no Unterstützig derzue cho. Dr Quinto het s'Vergniege gha, dr greescht Brueder vom Zeeka kenne z'lerne. Dr Beat het sich denn au no zue uns gsetzt und nachdäm s'Flüssige e weneli knapp worde isch, het är sich spontan bereit erklärt, schnäll mit dr Harley an d'Tanggi z'fahre und nomoll e weneli "Benzin" z'hoole. Dr Quinto het denn s'fählende Hirni miesse mit schnälle Bei kompensiere. Är het doch glatt ewäg dr Tequila dehaim vergässe!! Was är alles unterwägs erläbt het, dass froogt me ihn am beschte sälber. Sone Fahrt uff em Elektro-Roller cha aber scho no spassig si. Vor allem, wenn me so viil fahrt wie-n-är. S'groose Finale isch langsam aber sicher bevor gstande und nachdäm so ziemlich alli Glasbehältnis leer gsi sind, isch es ans Uffruume gange. Doch sowit simmer au wieder nit cho. Uss irgendwelche Gründ sind dr Zeeka und mini Weenigkeit plötzlich in die greeschti Wasserschlächt nördlich vom Äquator verwigglet gsi. Dr Quinto het sich vornähm zrugg ghalte. Luut unbestätigte Mediebricht hets am Sunntig ussgseh im Garte vo Zügers wie im Himmel voruss. Ich cha derzue numme saage, dass mini Klamotte am Sunntig z'Oobe no pflotschnass gsi sind. Ha se denn emol uffghängt. So um die drei in dr Nacht isch dä Event denn Vergangeheit gsi. E spassige Oobe meh, wo de Teilnähmer no e Zytli in Erinngerig bliibe wird. Sehr z'empfähle sind d'Foteli, wo vo dr ganze Gruppe gschosse worde sind. In däm Sinn dr Schaggi

Autor: Schaggi

Kategorie: Deppenontour

zrugg