» Über uns

» FAQs

» Linggs

» Intärn

Yyshockey BMG - Baloise (27.11.2005, 12:17)

Am letschte Samschtig, em 27. Novämber, isch uf dr Kunschti Margrethe wieder mol dr Plauschmatch zwische dr Fasnachtsclique BMG und einige Mitarbeiter vo dr Baloise sowie Friinde und Bekannte duuregfiehrt worde. Fiir d'Deppe am Start sind dr Joël und dr Diibidääbi als erfahreni Inline-Hockeyspieler sowie dr Schaggi als absolute Rookie gsi. Das ganze isch e riese Plausch gsi und sehr fair iiber d'Bühni gange. Nach aafängliche Fählschätzige was d'Stärkeverhältnis aagoht, het me in dr erschte Drittelspause d'Mannschafte umgstellt (d'Mullers zue dr BMG) und ab em zweite Drittel isches denn usglichener gsi. Es isch fiir jede e glungeni Sach gsi und au die wenige Fans wo sich ins Stadion verirrt händ, sind uf ihri Köschte ko. Es isch iibrigens, wie neuerdings üblich, nach dr Regeluslegig "null Toleranz" gspielt worde. Also fascht keini Checks und nur 2 mol het dr Schiiri miesse e Stroof gege e Spieler usspräche. Das isches denn aber au scho gsi. Iiber s'Resultat kamme numme spekuliere. Gwunne het ämmel d'BMG (Dank an d'Sek. Elsass), wenn au relativ knapp mit eim oder zwei Gool Differänz. Dr Schaggi isch nachem Match eso uf dr Schnuure gsi (ka e Mensch iiberhaupt soviel Schweiss verliere?), dass dr Daag denn au relativ gloffe gsi isch. Me gseht halt wär dä Sport efters betriebt... Merci em Zeeka no fiir d'Unterstützig und d'Fetteli. Wenn dä Aalass näggscht Johr nomoll stattfindet, hoffe mer doch, dass sich no me Lütt uf dr Margrethe iifinde. Vergässet eifach dr heissi Tee nit!!! Foteli: http://dot.zeeka.ch/051126-yyshockey/html/index.html

Autor: Schaggi

Kategorie: Sport

Letschti Änderig: 13.01.2006, 19:56 (Zeekadeethee)

zrugg