» Über uns

» FAQs

» Linggs

» Intärn

Reis noch Gämf (24.05.2003, 00:00)

Do jo s'Unterstütze vom beschte Fuessballclub vo de ganze Wält e Hauptaktivität vo uns isch und mir eh alles fuessballgeili Sieche sin, hämmer's uns, oder besser gseit hän sich die 5 männliche Deppe leider ohni wyblichs Wäse, notürlig nid chönne entgoloh, d'Mannschaft au im neue und, wie mer bald noch Aakunft händ müesse feschtstelle, sehr strythafte "Stade de Genève" z'supporte, woby ich an däre Stell nomol ganz kurz an kultige, nass-fyechte und zum Teils verschiffte Kurzabschtächer im wunderschöne, wälsche Dörfli Rolle und notürlig an die ganz Hiifahrt im einzige Toyota Yaris uf dr Wält mit Heckspoiler, was notürlich die einzig Ursach isch, dass s'Auto Gschwindigkeite im Überschallberiich, oder vellicht doch liicht drunter, agnoh het, will erinnere, ohni au no d'Parkkünscht vo unserem allsyyts gliebte Schaggi, welli me übrigens au uf eim vo de zahlriche, vo unserne Hobbyfotografe gschossene Föteli beauge cha, i irgend eim vo de zahlrich vorhandene Näbesätz z'vergässe. Nochdäm ich jetzt e kurze Satz über d'Hiifahrt verlore ha, möcht-y notürlich no schnäll e Satz zum Erläbte in Gänf sälber widme. Es haisst nomol tief iischnuufe und sicher dreimol läse zum alles z'verstoh. Im über 30° Celsius haisse und dazumal nonig vo wirkliche Deppe beschädigte Gänf aacho, hämmer uns nid diräggt ins Stadion begäh sondern händ uns die grosszügig gschtallteti Allmänd no iinezoge und do e jede d'Gluscht vo-n-ere küehle Glace paggt het, het's uns überhaupt nid gschtöhrt, dass mer noch rund drissig Minute warte au doch no prompt unseri bschtellte "zwei-glaine-Glacechugle-mit-e-bitzeli-Rahm-und-do's-jo-uf-de-Karte-stoht-e-Stückli-Banane" übercho händ, was derzue gfüehrt het, dass meh dernoch ziemlich schnäll vorem Stadion gschtande isch und d'Pünktlichkeit vo de Wälsche, i däm Fall vo de Gänfer, händ dörfe miterläbe, was unter anderem au zumene sprochlich bedingte Problem zwische de Stewards und emene FCB Fan gfüehrt het (Schö vö sölmo qö lö Fahne e lö prömie do lö Stadio), was aber nid wirklich de Grund derfür gsi isch, dass mer erscht noch einiger Zyt und e chli umelaufe unseri Plätz händ chönne iinäh und wenig spöter händ miesse feschtschtelle wie scheisse unser Joggeli in Sache Akkustik doch isch, was uns notürlich dopplet motiviert het, nochere wunderbare Pyroiilag vo unserne Kollege us de Mitti Unde, unsere Club gsanglich und durch weniger melodiösi Schlachtrüef z'unterschtütze, woby das wohl aber nid de einzig Grund derfür gsi isch, dass unseri Jungs scho zur Halbzyyt locker gfüehrt hend und d'Zueschauer sich meh uf e Match im Hardturm, wo de GCZ s'doch no gschafft het e 0:2 Ruckstand zur Pause ine 4:2 i de zwaite Halbzyyt umzwandle, z'konzentriere, was schlussändlich derzue gfüehrt het, dass me nochem eigene Schlusspfiff nid richtig gwüsst het, ob meh sich soll freue oder doch enttüscht si, do s'Pünktli Abschtand zu de Insekte Beschtändigkeit gwohrt het. So, s'heisst wieder usschnuufe und no kurz erfahre, dass uf de Ruggfahrt d'Usfahrt Deitinge Nord gfunde worde isch und meh sich im Cindy's Restaurant e faine Happe gönnd het und mer z'Schwellheim no d'Ehr kha händ unseri topfiti Dehaiblibeni z'bsueche und vollständig no e sehr läckeri Schwarzwäldertorte z'verdrucke. So, ich hoff, es het euch gfalle mini Zämmefassig z'läse und wenn nid, wär jo mi Zyyl, dass y nie meh e Bricht muess schriibe, erreicht. In diesem Sinne...... eure Diibidääbi

Autor: Diibidääbi

Kategorie: Deppenontour

zrugg