» Über uns

» FAQs

» Linggs

» Intärn

4. DOT's Wednesday (17.11.2005, 11:56)

Dr 4. Deppenmittwuch isch, wie kennts au anderscht sy, im Zeiche vo dr Schwizer Nati gstande. D'Mäss-Frässer vom 3. DOT's W. händ sich bi dr Sektion Elsass droffe um gmietlig das brisante Mätschli z'luege. Wie me uf de Föteli ka feschtstelle hets nit an Flüssigem gmanglet. So isches also losgange, vorerscht ohni Diibidääbi, dä het nämlig no e Ligamatch gha wo leider au nit so fair verloffe isch, aber das isch e anderi Gschicht. Me het sichs vor dr Glotzi gmietlig gmacht, d'Chips sind offe gsi, s'Bier in de Händ zum öffne, in däre Zyt isch dr Match aapfiffe worde und just in däm Momänt wo me het welle dr Fläschehals an die fiechte, erwartigsfrohe Lippe aasetze het sich dr Frei Alexander ussem Baselbiet d'Pille gschnappt und uf e Penaltypunggt gleggt. E Mängge wird sich dänggt ha "verglemmi nomoll, das isch doch jetzt nit wohr, Penalty nach einere Minute?". Ebefalls sehr ungläubig sind unseri 4 Helde vor em TV gsässe und händ abgwartet was passiert. Päng hets gmacht und d'Schwiz isch einsnull vorne gsi. So schnäll ka's go, de Türgge händ also jetzt 4 Gool gfählt. D'Stimmig isch pletzlig viel loggerer gsi, d'Nervosität fascht wägg und me het kenne dr Match gniesse. S'isch denn au iiber allerhand gredet worde, nit nur iiber Fuessball, wobi dr Match immer im Mittelpunggt gstande isch. Dangg em Gool vom Frei hämmer leider iiberhaupt nüt vo dr Stimmig in Istanbul mitbeko, s'isch in dr erschte Halbzyt erstuunlig ruhig gsi. Unterdesse isch au dr Diibidääbi derzue gstosse, ändlig (fascht) vollzählig. Me het unterenand die heisse Szene diskutiert und ghofft, dass die helvetischi Verteidigung de Türgge ka standhalte wie friener de Habsburger. Leider muess me aber sage, dasses zur Pause tatsächlich 2-1 fiir d'Bosporuskicker gstande isch. D'Stimmig in dr Parkallee isch trotzdäm guet gsi, erschtens isch d'Kombination Deppen / Bier immer e gueti Sach und zweitens wär d'Schwiz jo au mit dere Niederlaag derbi. Aber e jede het gwüsst: es stöhnd is no heissi 45 Minute bevor! Schnäll also nomoll kontrolliert ob s'Bier wirgligg bis zum Schluss länggt und ob dr Cinzano parrat stoht. Me muess jo schliessligg d'Fescht fiire wie si falle! Gfalle isch denn tatsächligg ebbis, leider aber e Türgg im Schwizer Stroofruum. Und do jo dr Zubi "kei Penaltykiller isch" (Zitat Diibidääbi), isch 3-1 fiirs Muetterland vom Döner gstande. Ändlig dr erwarteti Närvekrieg, jetzt isch alles meegligg. Leider het sich jetzt au langsam d'Bloose bim eint oder andere gmäldet. S'het ein also wirgligg fascht verjaggt vor Spannig. D'Fläschli händ sich immer meh mit Luft gfüllt und dr Match isch langsam gege s'Änd gange. Me het s'Ziel scho förmlich gseh, Dütschland isch nüm witt gsi. Do macht dr Streller vermeintlich dr Sagg zue in däm är ändlig si erschte Träffer in dr Nati erzielt. 86 Minute gspielt, 3-2 fiir d'Türgge und die miesste no 2 Gool schiesse. Do derf me eigentligg vonere Vorentscheidig rede. Pletzligg isch aber uf em Bildschirm 4-2 gstande und dr Schaggi het e kurze Momänt gmeint, dasses velicht doch e bitz viel Bier fiir si zarte Maage gsi isch. Das Gool het är nämlig absolut verpasst und das wo d'Türgge jetzt grad gschosse händ, das isch jo schliesslig Abseits gsi! Aber die andere 3 händ em erklärt das de Topf zellt und dasses jetzt eifach e no heisseri Schlussphase git. Närvekitzel pur, ka me saage. E Nation fieberet vor em Färnseh, unseri Deppe wisse fascht nüm wie si heisse und frässe dr Karton vom Bier, so spannend isches gsi. Do pfifft dr Schiiri ändlig ab und s'isch volländet: d'Schwiz fahrt an d'WM 2006 in Dütschland, Gratulation notierlig au vo de Deppenontour (mer sind scho immer Nati-Fans gsi!!) Uf die hässlige Szene nach em Match wott dr Autor nit iigoh. So ebbis het do kei Platz. Es wird aber scharf verurteilt! Jetzt het me eifach kenne entspannt uf em Sofa hogge, s'isch gschafft, me isch derbi. Prompt sind die alte Heftli mit de Sammelbildli fiiregnoh worde und me het gluegt, wär im '90, '94 und im '98 alles an dr WM gspielt het. Wär kennt no d'Hurrikan-Gedängg-Frisur vom Carlos Valderama? Oder dickes Diego? Jäjä, das sind no Zyte gsi, dass sind no Männer gsi wo uf em Fäld gstande sind! Zue de Heftli aane hett me sich e Gläsli Cinzano gönnt und im Färnseh isch no die zweit Halbzyt vo dr U21 gloffe, wo gege Portugal um d'EM-Deilnahm gstoche het. Leider händ d'Schwizer do aber kei Glygg gha und sind mitemene Gsamtscore vo 2-3 usgschiede. Jänu, kasch nit immer gwinne. Nachdäm denn au no e Schlüggli Cynar dunde gsi isch und alli Fuessballheftli duuregluegt worde sind, het me sich langsam derzue entschlosse, dä sportlich erfolgriichi Oobe z'beände. Sälber isch me zwar nit so aggtiv gsi wie an de letschte DOT's W., aber es het au e heide Spass gmacht. Näggschte Mittwuch gohts wieter, dr Brichterstatter wird au dert wieder Protokoll fiere. E scheeni Wuche allne zämme! Föteli: http://dot.zeeka.ch/051116-wednesday4/html/index.html

Autor: Schaggi

Kategorie: Deppenontour

Letschti Änderig: 13.01.2006, 19:57 (Zeekadeethee)

zrugg